Ռուսական կողմը շարունակում է պնդել, որ Ուկրաինայում հակամարտության կարգավորման շուրջ բանակցությունները պետք է անցկացվեն փակ ռեժիմով։ ՌԴ նախագահի մամուլի քարտուղար Դմիտրի Պեսկովը հայտարարել է, որ Մոսկվան դիտարկում է ԱՄՆ-ի և Ուկրաինայի մշակած 20 կետանոց խաղաղության ծրագիրը որպես բանակցությունների մեկնարկային կետ։ Սակայն, ըստ Կրեմլի, ծրագրի ներկա տարբերակը բազմաթիվ հարցեր անպատասխան է թողնում։
Ուկրաինայի նախագահ Վլադիմիր Զելենսկին առաջին անգամ հրապարակավ ներկայացրել է խաղաղության ծրագրի բոլոր 20 կետերը։ Դրանք ներառում են Ռուսաստանի և Ուկրաինայի միջև չհարձակման մասին համաձայնագիրը, Ուկրաինայի ինքնիշխանության հաստատումը և անվտանգության երաշխիքները։ Սակայն Ռուսաստանը պահանջում է ՆԱՏՕ-ի չընդլայնման և Ուկրաինայի չեզոք կարգավիճակի վերաբերյալ հստակ երաշխիքներ։
Ըստ Պեսկովի՝ ՌԴ նախագահի հատուկ ներկայացուցիչ Կիրիլ Դմիտրիևը զեկուցել է Վլադիմիր Պուտինին Մայամիում տեղի ունեցած բանակցությունների արդյունքների մասին։ Այս տեղեկատվության հիման վրա Մոսկվան կձևակերպի իր դիրքորոշումը և կշարունակի շփումները Վաշինգտոնի հետ առկա կապուղիներով։ Պեսկովը նշել է, որ ռուսական կողմի դիրքորոշման հիմնական պարամետրերը հայտնի են ԱՄՆ գործընկերներին։